Друштвото за издавачка дејност „Македоника“ од Скопје ја објави книгата „Македонски литературен потсетник“ – книга 1, на проф. д-р Науме Радически.
Првата книга од „Македонски литературен потсетник“ претставува аналитичка ретроспектива на македонската литература, почнувајќи од средината на 19 век до првата декада на 21 век. Содржи во најголемиот дел студии, а помалку есеистички и критички прилози за маркантни персонални појави, вредности и процеси во македонската литература.
На сцената на македонската литература, како поет, и на сцената на македонската литературна наука, како критичар, есеист и проучувач на македонската литература во 19 и 20 век, Науме Радически е присутен безмалку 40 години.
Радически работи на Филолошкиот факултет во Скопје. Автор е на повеќе книги, негови поетски творби, критичко-есеистички текстови и статии од литературната наука се преведувани на други јазици. Самиот тој преведува од другите јужнословенски јазици.