Од 21 до 27 јуни во Кинотеката ќе се одржи Неделата на бугарски документарни филмови. Во седумте вечери посветени на авторите од новиот документаристички бран на бугарската кинематографија, како и класичните автори, ќе бидат прикажани десет краткометражни и долгометражни наслови.
Како што најавија од Кинотека, Станислав Дончев, Јордан Тодоров, Борислав Колев, Андреј Паунов, Светослав Стојанов, Коста Биков, Тонислав Христов, Елдора Трајкова, Панчо Цанков и Анри Кулев се авторите на филмовите од оваа селекција.
Продуцентката Мартичка Божилова, сценаристката Петја Александрова и филмскиот критичар и историчар на филмот Росен Спасов ќе бидат гости на оваа кинотечна програма и публиката ќе има можност да разговара со нив по проекциите на филмовите.
Според програмата, на 21 јуни, во среда, ќе се одржи проекција на филмот „Стражарите на нашата совест“, во режија на Станислав Дончев, а по сценарио на Петја Александрова и Теодора Стоилова-Дончева. По завршување на филмот, Петја Александрова ќе ја промовира книгата „Бугарскиот посттоталитарен документарен филм“ на Теодора Стоилова – Дончева.
Следниот ден, во четврток ќе биде прикажан документарниот филм „Сонувам музика“, во режија на Анри Кулев а по сценарио на Борис Христов. Потоа, следува проекција на филмовите „Есенски“, во режија на Панчо Цанков, а сценарио на Панчо Цанков, како и „За луѓето и мечките“, во режија на Елдора Трајкова, а сценарио на Асен Владимиров.
Во петокот, на 23 јуни ќе биде прикажан филмот „Тато снима мрсни филмови“ во режија на Јордан Тодоров а сценарио на Јордан Тодоров, како и филмот „Стоичков“ во режија и сценарио на Борислав Колев.
На 24 јуни во сабота ќе се одржи проекција на „Проблемот со комарците и други истории“ во режија на Андреј Паунов а сценарио на Лилија Топузова. Следниот ден, 25 јуни ќе биде прикажан филмот „Последните пирати од црното море“ во режија на Светослав Стојанов, а сценарио на Вања Рајнова.
На 26 јуни предвидено е да се одржи проекција на филмот „Граѓанинот филм“ во режија и сценарио на Коста Биков, а на 27 јуни ќе биде прикажан филмот „Добриот поштар“. Режисер на филмот е Тонислав Христов, кој исто така се потпишува на сценариото заедно со Љубомир Цветков.