Стефан Неделковски на саксофон е добитник на Гран-при наградата на 18. Интернационалeн музички натпревар за млади музичари „Охридски бисери” што се одржа во Охрид. Втората и третата награда им припадна на музичари на труба – Стефан Георгиев и Јустас Дракшас.
Исто така, беше доделена и Специјална награда од Фондацијата „Томислав Зографски“, Награда за најдобра изведба од македонски автор и Награда за најдобри македонски изведувачи.
На синоќешниот завршен концерт беа доделени 12 награди на младите музичари во три возрасни категории и седум дисциплини на дувачки инструменти. Исто така, интернационалното жири составено од врвни музички педагози ги избра добитниците на највиоките признанија на натпреварувањето.
Градоначалникот Константин Георгиески на добитникот на Гран-при му врачи и посебна награда од Општина Охрид.
Традиционалниот музички натпревар што се одржуваше во изминатите денови е осмислен за да се откријат и стимулираат исклучително талентирани ученици и студенти, млади музичари, да се забележи нивото на напредок во музичкото образование и да им се овозможи да прераснат во професионални уметници.