Славниот музеј во Париз, Лувр, е повторно отворен за посетителите, откако вработените протестираа поради големиот број кражби. Персоналот мораше да го затвори музејот бидејки имало преголем број на крадци кои оперирале како банди, а во нив биле вклучени и малолетни лица.
Претставничка на синдикатот на вработени во Лувр, Кристел Гијадер, изјавила дека на вработените им е преку глава од сè.
– Доаѓаат на работа во страв зашто се соочени со организирани групи на џепчии кои се се поагресивни, а меѓу нив се и малолетници кои во музејот влегуваат бесплатно, а полицијата ги пушта на слобода само неколку дена откако ќе ги уапси – објаснила таа.
Околу 100 вработени дури излегоа и на протест пред министерството за култура под чија надлежност е музејот
Менаџментот на Лувр презема мерки за зајакнување на безбедноста во музејот. Лувр годишно го посетуваат 10 милиони туристи и е најпосетен музеј во светот.