Издавачката куќа Феникс, во пресрет на Меѓународниот саем на книгата во Скопје, деновиве ја објави книгата „Љубовта, убавината, славата“ од Енди Ворхол.
Според издавачот, станува збор за необично и ретко издание, во кое самиот автор Енди Ворхол говори, односно пишува за својата филозофија.
– Оваа книга го претставува славниот американски уметник преку неговите записи, размислувања и транскрипции на неговите разговори со луѓето со кои се дружел.
– Можеби тоа е и најдобриот начин да го запознаеме како личност, бидејќи во неа не зборува само за уметноста, туку и за се она што го интересирало во животот: слава, пари, секс, љубов.
– Во тие записи и фрагменти од разговорите го откриваме Ворхол и како бизнисмен и како уметник, но и како внимателен син кој живеел со својата мајка се до нејзината смрт. Тој е и своевиден Оскар Вајлд, кој повеќе се крие, отколку што се открива преку прифатените парадокси кои го воделе и низ животот и низ уметноста, се наведува во текстот на издавачот кон книгата.