„Македоника“ од Скопје ја објави книгата со афоризми „Крлук“ на македонскиот афористичар Атанас Крлевски. Книгата содржи близу 400 афоризми поделени во три циклуси, а е објавен и поговор од Ана Витанова-Рингачева. „Крлук“ е трета книга со афоризми на Крлевски. Претходно ги објавил „Крлевизми“ и „Окрлавени мисли“.
– Мислите во „Крлук“ се сериозни, длабоко обмислени и промислени, напати мачни и непожелни за читање и слушање, но длабоко вистинити и суштествени. Тие засмејуваат, замислуваат, заведуваат, залажуваат, но пред сè и над сè отрезнуваат и освестуваат… Афоризмите на Крлевски ја цитираат стварноста, читателот има чувство дека тоа се негови зборови, едноставно читателот ја добива улогата на коавтор и со тоа го добива правото нив да ги цитира за свои потреби, пишува Витанова-Рингачева.
Атанас Крлевски (Ташкент, 1956) живее и работи во Велес и афоризми пишува три и пол децении. Автор е на многу антологиски афоризми, наградуван е во земјата и во странство и е застапуван во меѓународни антологии. Објавувал во „Остен“, „Студентски збор“, „Млад борец“, „Македонски остен“, а денес соработува во повеќе печатени и електронски сатирични списанија и потрали.