По повод Интернационалниот празник и роденден на инструментот хармоника вечер во Mузејот на македонската борба за државност и самостојност во Скопје ќе се одржи концерт во организација на Здружението на хармоникашите од Македонија „Љубители на класична музика”.
На свечениот концерт ќе настапат ученици и студенти од класата на проф. Зорица Каракутовска, како и реномирани уметници од целата држава. На програмата ќе бидат изведени дела од: Хендл, Золотарјов, Дербенко, Илиевска- Бете, Војтенко, Пјацола и други.
Здружението „Љубители на класична музика” Скопје е членка на Светската унија на хармоникашите – Confédération Internationale des Accordéonistes (CIA), која во 2009 година одлучи 6-ти мај да го прогласи за Светски ден на хармониката. На тој датум во 1829 година за прв пат е патентиран инструментот хармоника.
Меѓународниот проект „6-ти мај Светски ден на хармониката” македонското здружение на хармоникашите го поддржува со реализација на концерти во земјата и странство. Оваа година по петти пат здружението организира свечен концерт по тој повод.