Во Камерната сала на Филхармонија вечер од 20 часот ќе настапи гитарското „Трио Елогио“, основано од гитаристите Петрит Чеку од Косово, Педро Рибеиро Родригез од Португалија и Томислав Вукшиќ од Хрватска, кои ќе изведат дела од Моцарт, Руждјак, Рахмањинов, Шуберт…
Тројцата гитаристи обединети во триото „Елогио“ имале голем број концерти особено на европските фестивали. Посебен придонес имаат за зачувување на хрватското звучно творештво, а неодамна го снимија и нивното ново цеде со дела од Моцарт, Руждјак и Дворжак.
Петрит Чеку е роден во 1985 година во Косово каде што го почнал музичкото образование, а кога се преселил во Загреб во 2002 продолжил да студира на тамошната Музичка академија каде што и дипломирал. Од 2009 до 2013 година се усовршувал на Конзерваториумот „Пибоди“ во Балтимор. Неговиот исклучителен сензибилитет и експресивност ја привлекуваат публиката и критичарите низ светот.
Томислав Вукшиќ е роден во 1980 во Загреб. Дипломирал гитара во Загреб, а постдипломските студии ги завршил на Кралскиот конзерваториум во Ден Хаг, кога му е доделна престижна стипендија за талентирани студенти. Добитник е на неколку награди на хрватските државни и меѓународни натпревари за гитара, а во моментов работи како доцент на Музичката академија во Загреб.
Педро Рибеиро Родригез, пак, е класичен гитарист од Португалија и делува како солист, камерен музичар, педагог и аранжер. На својот прв носач на звук („Нумерика“ 2013) ги изведува сонатите на Карлос Сеиксас во сопствена обработка за гитара, што е единствената солистичка гитарска снимка во целост посветена на тој португалски композитор.