Архивот Бужаровски (BuzAr) од први декември започна со системско објавување на извонредно богатиот дигитализиран материјал на својата веб страница http://buzar.mk. Архивот содржи 12 колекции со македонски и балкански фолклор, меѓу кои колекциите Фирфов, Видоески, Пенушлиски, Брзанов, Бадев и Линин.
Покрај над двете илјади македонски песни, мелограми, приказни, дијалектен говорен материјал, во BuzAr се дигитализирани и над илјада документарни фотографии, а сопствената продукција содржи и голем број снимки од концерти од сериозната музика со македонски изведувачи, документарни филмови и видео од голем број музички и културни настани.
Со оглед на тоа што овој архив во кој системски се дигитализира културното наследство од 2000 година наваму, се одржува исклучиво на ентузијазмот на неговите соработници, и соодветно архивот поседува ограничен Интернет простор, поставувањето на двата терабајти дигитализирани материјали ќе биде спроведувано сукцесивно во подолг временски период.
Во овој момент на страницата е започнато со поставувањето на колекцијата Фирфов, односно со оригиналните аудио снимки и мелографираниот материјал од основоположникот на македонската етномузикологија Живко Фирфов. Покрај ова, премиерно e поставен и естетичкиот перформанс Музички прашања од Димитрије Бужаровски и првиот број од списанието на архивот, BuzAr Journal, кое е исто така со слободен достап.
Списанието го уредува меѓународен одбор, а во него се поставуваат и архивираните текстови од ИРАМ-овите конференции, како и трудови од млади истражувачи од подрачјето на музикологијата и етномузикологијата. Првиот број на списанието содржи текстови од членовите на уредувачкиот одбор: Џери Хамфрис, Франц Крижнар, Милена Ѓурковиќ-Пантелиќ, Димитрије Бужаровски и Трена Јорданоска.
Уредник на списанието и на сајтот е доц. д-р Трена Јорданоска. Архивот Бужаровски е оформен околу музиколошката и творечката дејност на проф. д-р Димитрије Бужаровски за кој во изминатиот месец Сенатот на Универзитетот во Ниш едногласно донесе одлука да му се додели титулата почесен доктор на Универзитетот во Ниш.