Културно-информативниот центар на Република Македонија во Софија синоќа беше посетен од голем број љубители на поезијата, на промоцијата на поетесата Лилјана Дирјан и академик Богомил Ѓузел, информира КИЦ.
Настанот го отвори директорот на Центарот Васко Шутаров, кој нагласи дека со него македонскиот КИЦ влегува во сезоната на чествувањето на своето 10-годишно постоење.
За книжевниот опус на Дирјан и Ѓузел зборуваа литературниот критичар Елизабета Шелева од Филолошкиот факултет во Скопје, Александар Шурбанов од Софискиот универзитет и Светлозар Игов од Институтот за литература во БАН.
– Преведувачот Цветанка Еленкова посебно се осврна на стихозбирката „Остров на копното” која на бугарски јазик ја објави книгоиздателството „Балкани”. Исклучително внимание предизвика и промоцијата на стихозбирката на бугарски јазик „Со невидливиот сокол на рамето” од Лилјана Дирјан, соопшти КИЦ на РМ.
Книжевната вечер посветена на академик Богомил Ѓузел и Лилјана Дирјан на едно место собра бројни познати бугарски писатели, литературни критичари, преведувачи, познавачи и почитувачи на нивното книжевно дело.
Проектот беше дел од Годишната програма на КИЦ на Р. Македонија, поддржан од Министерството за култура и остварено во соработка со Независните писатели на Македонија.