Во издание на Друштвото на словенечките писатели во Љубљана излезе обемна антологија на современата малцинска и имигрантска книжевност во Словенија „Од јазик на јазик“ чија главна и одговорна уредничка е Лидија Димковска.
Во изборот и подготовката на антологијата, освен Димковска учествуваа и повеќе соуредници за поединечни јазици како и 25 учесници на работилниците за уредничко дело што Димковска ги водеше во претходните месеци во Друштвото на словенечките писатели.
Ова е прва антологија во Словенија која донесува книжевни текстови (поезија, проза, драма, литература за деца) од 34 автори/авторки кои живеат и творат во Словенија на своите мајчини јазици (италијански, унгарски, ромски, словачки, англиски, македонски, српски, хрватски и босански јазик).
Меѓу другите во антологијата се застапени и дела на Жанина Мирчевска која подолго време живее и работи во Љубљана, на Бистра Кумбароска, претставничка на најновата македонска книжевна генерација која во последните неколку години живее во Словенија и на Соња Цекова Стојаноска, втора генерација доселеници од Македонија. Во обемниот предговор на Димковска се нагласува важноста и потребата од таква антологија во словенечкиот книжевен простор со кој тој се шири и се збогатува со најдобрите книжевни дела напишани на други мајчини јазици во Словенија.
Антологијата беше промовирана на меѓународната ПЕН конференција на Блед, на меѓународниот книжевен фестивал „Форум Томица“ во Копер, а својата главна промоција ја доживеа во Цанкарјев дом во Љубљана кој важи за најпрестижна институција на културата во Словенија. Следуваат и повеќе промоции ширум библиотеките низ Словенија како и на Меѓународниот книжевен фестивал „Виленица“ во септември.