Во Кинотеката на Македонија ќе се одржи промоцијата на втората книга со рецензии за филмови од Тони Цифровски, под наслов „Кинеење 2 (следната генерација)“, што ќе биде претставена во вторник, 7. април од 12 часот.
Ова издание е збирка од 60-тина рецензии за филмови прикажани на домашниот редовен или фестивалски кино-репертоар во период од 4 години (од 2011 до втората половина на минатата година). Во рецензијата за оваа книга писателот Гоце Смилевски, меѓу другото, истакнува: „Филмските критики на Тони Цифровски, освен што ги остваруваат веќе посочените цели од сферата на естетското, но и од едукативното, можат да се согледаат и како историја на кино репертоарот во Македонија во периодот во кој се пишувани…“
Со поддршка од Министерството за култура на Република Македонија, книгата излезе во печат под етикетата на Издавачката куќа „Маска“ од Скопје.
Делото ќе го промовираат м-р Мими Ѓоргоска Илиевска, директор на Кинотеката на Македонија и Тодор Кузманов, новинар и критичар во Македонското радио.