Излезе од печат збирката раскази „Скопски дамари“ од Благоја Иванов

Од:

Од печат денеска излезе збирката раскази „Скопски дамари“ од реномираниот македонски писател Благоја Иванов, со поднаслов „автентичен книжевен вкус на старо и ново Скопје низ дваесетина антологиски раскази “.

Се работи за 184 издание во едицијата „Проаза“ на издавачката куќа „ИЛИ-ИЛИ“, чиј визуелен дизајн е дело на Марија Смилевска, а излегувањето на книгата е поддржано од Град Скопје. Книгата денеска ќе може да се купи по промотивна цена во книжарницата „ИЛИ-ИЛИ“.

Од Издавачката куќа „ИЛИ-ИЛИ“ наведоа дека изборот на расказите го направил Игор Анѓелков, кој во освртот кон збирката нагласува дека Иванов, заедно со Славко Јаневски, Влада Урошевиќ и Димитар Солев, е континуираниот хроничар на скопските случувања во неговите дела од пред Втората светска војна до денешен ден.

– Сето она што го раскажува Иванов во своите приказни за Скопје, како ретко кој македонски писател, создава своевидна мапа на градот, карта од која извира животна сила составена од нерви и крвни садови за силна пулсација на урбаното битие, која содржи и разни пукнатини и шуплини пред кои не смее да се затворат очите и кои треба да се забележат и прераскажат. Така Скопје на суптилен начин станува засебен лик во оваа збирка раскази, град-личност кој секогаш е подготвен да ја покаже својата сила, „небаре сениште кое тешко ја поднесува дневната светлина“, но тој е и „брод со драгоцен товар“ на кој секогаш ќе му се навраќаме во нашите книжевни творби. Со почит кон Скопје, и особено кон Благоја Иванов, Ви посакувам пријатно патување низ скопските книжевни дамари, засолнати од заборавот на ова посебно место, во оваа драгоцена книга, напиша Анѓелков.

Благоја Иванов (1931) е македонски раскажувач, романописец, есеист, критичар и драмски автор. Завршил Филолошки факултет во Скопје. Работел како главен уредник на Културниот сектор на Радио Скопје, директор на Телевизија Скопје и професор на ФДУ. Долги години го уредувал списанието „Млада литература“, а бил и главен и одговорен уредник на списанието „Разгледи“. Член е на ДПМ од 1958 година и негов претседател во два мандати. Член е на Македонскиот ПЕН центар. Добитник е на наградите: „1 Мај“, „Недела на радио драмата на ЈРТ“, „Рациново признание“, „Кочо Рацин“.

Би можело да ве интересира

„Разговори со Конески“ од Цане Андреевски во издание на „Матица македонска“

Ана Ололовска

Романот „Амбасади“ на Луан Старова објавен на бугарски јазик

Ана Ололовска

Нов број на списанието „Македоника“

Ана Ололовска

Промоција на книгата „Мое виножито“ од Даниела Ангелова – Прнарова

Ана Ололовска

Промоција на „Порој од пепел“ од Исток Улчар

Ана Ололовска

Романот „Круг“ од Димитар Башевски објавен во Софија

А1он