Фондот на холокаустот на Евреите од Република Северна Македонија ги објави наградените автори на првиот литературниот конкурс „Раскажувам фотографија“ – за раскази со мотиви од предвоениот живот и страдањето на македонските Евреи.
Организаторот соопшти дека конкурсот се потврдил како исклучително успешен зашто пристигнале 138 литературни творби – најголем дел солидно напишани прози, а повеќе автори конкурирале со два или повеќе прилози.
Тричлено жири – во состав Жаклина Мучева (претседател) и Гордана Ивановска-Велковска и Томислав Османли, три месеци работеле на селекција на расказите и едногласно ги донеле одлуките за трите награди за, како што се наведува во соопштенито – „најсупериорни раскази со изразити литературни градби и книжевни квалитети, од предложеното мноштво“.
Првата награда ѝ припадна на прозата „Ѕвездата“ од Михајло Свидерски – поради драматиката на текстот набиен со внатрешен интензитет и остварена со врвна книжевна едноставност; втората награда е доделена на расказот „Ja vjeni dies“ на авторката Светлана Папачек – за мошне сугестивно раскажаната трагична приказна при што книжевниот сентимент не преминува во патетичност, и третата награда ѝ се доделува на книжевната творба „Метларот“ на Габриела Стојаноска-Станоеска – за квалитетото литераризирање и на еден мотив (и професија), кој израснува во крупна драматична метафора.
-Ценејќи го исклучителниот креативен напор вложуван во текот на целиот конкурс низ учеството со многубројни творби пишувани со познавање факти од животот на Евреите во Македонија и на еврејската религија и култура, жирито го истакнува учеството на авторот Антонио Стојановски и му доделува Специјално признание за тоа негово обемно и посветено учество. Признанието се проследува со избор на книги во издание на Меморијалниот центар на холокаустот на Евреите од Македонија, соопшти Фондот на холокаустот на Евреите.
Жирито посебно ги истакна и пофали книжевните квалитети и придонеси на финалистите на овој конкурс и за нив предлага доделување пофалници: Владимир Плавевски за расказот „Риболовци“, Билјана Лотеска за расказот „Недопеана песна“, Цвете Јовановска за расказот „Хана, девојчето со сини очи – Патување без враќање“ и Александра Ристовски за расказот „Мојот мост“.