Кореографката Искра Шукарова денеска ќе настапи во Софија. Гостувањето е дел од програмата на Културно-информативниот центар на Република Македонија во Софија, која е поддржана од македонското Министерство за култура.
Настанот ќе се одржи во рамки на деветтата едиција на танцови концерти, организирани од фондацијата „Етуд“ во соработка со Центарот за култура „Црвената куќа“.
Учесници во балетските претстави се Викторија Илиоска, Бистра Делиниколова, Елена Ристеска, прва генерација дипломирани студенти од класата на Искра Шукарова, како професор на катедрата за балетска педагогија при Факултетот за музичка уметност. Музиката и изведбата во двете дела е на Валентин Димановски.
– Целта на овие концерти е да се промовира и поддржува современиот танц. Како дел од програмата настапуваат и етаблирани кореографи од бугарската сцена, како Галина Борисова, која е иницијатор и организатор на настанот, информира Културно-информативниот центар на Република Македонија во Софија.