Издавачката куќа „Дијалог“ од Скопје го објави и претстави „Градот на јужното море“, прв роман на драмскиот писател и публицист Зоран Пејковски од Битола.
Рецензенти на романот се Јордан Плевнеш и Братислав Ташковски, а по промоцијата на саемот на книгата во Скопје, романот „Градот на јужното море“ денес беше претставен и во родниот град на Пејковски.
– Романот го подготвував и пишував десет години, во неговата содржина има 36 глави кои сами за себе се различна приказна, со пролог и епилог, со недоброј драматуршки форми и затоа сметам дека овој роман може да биде искористен како драмски текст, но и како сценарио за филм. Секоја продуцентска куќа може да го искористи овој роман бидејќи драматизацијата лесно се подготвува и сигурно дека имагинацијата во овој роман ќе биде инспирација и за други форми на уметничко изразување, посочи Пејковски.
Со издавањето на романот „Градот на јужното море“ авторот Зоран Пејковски го продолжува и зголемува творечкиот опус кој како што вели посебно богат беше минатата 2014 година кога од печат излегоа збирката песни „Сега знам“, драмскиот ракопис „Сите наши кодоши“ и драмата во стих „Самуиловото распетие“ од која произлезе сценско-драмскиот рецитал „Херувимите на Самуиловата круна“ одиграна по повод 1000 годиниод смртта на царот Самуил.
Зоран Пејковски е драматург во народниот театар од Охрид и главен и одговорен уредник на битолскиот информативен неделник „Јавност“.