Македонската филхармонија и Македонската опера и балет вечер во МОБ ќе одржат концерт „Ода на радоста“, под диригентство на Оливер Балабурски.
Солисти ќе бидат сопран Ана Дурловски, францускиот мецосопран Беренжер Модуи, полскиот тенор Богуслав Бижински и германскиот бас-баритон Џо Полхајм.
На програмата е Симфонијата бр. 9 на Лудвиг ван Бетовен, завршена во 1824 година.
– Таа претставува врв на симфонискиот опус на композиторот, негов финален симфониски есеј во кој кулминираат мелодиското мајсторство, хармонското богатство и извонредното чувство за развој и организација на музичкиот материјал и градење кулминации што буквално оставаат без здив. „Деветтата“ не е само врвно достигнување на класицизмот и дело-водилка кон романтизмот, туку и супериорна композиција чии звуци се поистоветуваат со химна на човештвото и хуманизмот, соопштија Филхармонијата и МОБ.