Во рамките на 12 Интернационален фестивал на античка драма „Стоби 2013“ вечер во 21 часот на сцената на амфитеатарот во древниот Стоби ќе биде изведена претставата „Евридика“ според делотот на Сара Рул во режија на Нина Николиќ во изведба на Драмскиот театар од Скопје.
На сајтот на Драмски за оваа претстава се појаснува: „Претставата ,Евридика‘ работена по истоимениот текст на Сара Рул, претставува ново и поинакво видување на митот за најголемата љубов на светот и на тој начин претставува круцијални прашања за љубовта,времето,животот и смртта. Оваа драма не’ потсетува на влијанието кое го имаат на нас луѓето со кои сме оствариле каков и да било контакт, на влијанијата кои ние ги имаме на туѓите животи, на нашите сеќавања и несвесната меморија и на тоа дека човекот не може да заборави. Сеќавањата се запишани некаде длабоко во човечката душа и сето она што не’ допрело, останува со нас до крајот на времето.“
Претставата е третата на фестивалот која се натпреварува за една од наградите што ќе бидат врачени на 20 јули во Стоби: за најдобра женска и машка улога, за најдобра режија и најдобра претстава.