Балетот на мраз „Оревокршачка“ од Чајковски на Државниот балет на мраз од Санкт Петербург на 4 декември во Македонската опера и балет ќе има две изведби поради голем интерес од публиката.
Билетите за претставата од 20 часот се веќе распродадени, така што е одлучено истата вечер да има уште една претстава со почеток во 22 часот, соопшти Прагма продукција која го организира гостувањето.
Државниот балет на мраз од Санкт Петербург ги спојува балетската уметност и уметничкото лизгање како најелегантен спорт. Основан е во 1967 година од балетскиот кореограф Константин Бојарски. Музички директор и коосновач на оваа балетска куќа е познатиот руски диригент Лео Коркин.
Минатата година Балетот гостуваше во МОБ со „Лебедово езеро“ од Чајковски. Од овој руски композитор на репертоарот ја има и балетската претстава „Заспаната убавица“, како и балетите „Ромео и Јулија“ и „Пепелашка“ од Сергеј Прокофјев.
Билетите за втората закажана претстава на балетот на мраз „Оревокршачка“ може да се набават преку продажната мрежа на КупиКартиЗаСе низ цела Македонија, во „Пола Југотон”, „Југотон”, Цвеќара „Розе” – Веро 2, како и онлајн на www.kupikartizase.com.