Групна изложба насловена „Метаморфоза“ ќе биде отворена вечерва, во 20 часот, на неколку локации во централното градско подрачје: Дом на АРМ, плоштадот „Македонија“ и плоштадот „Филип Втори“.
Во проектот, чиј куратор е Христијан Санев (ликовен уметник и член на раководството на ДЛУМ), учествуваат авторите: Гордана Вренцоска, Исмет Рамиќевиќ, Деспина Крстевска, Филип Фидановски, Ели Аиноска, Јана Манева Чупоска и Јовица Мијалковиќ, кои ќе се претстават со дела работени во повеќе ликовни медиуми.
„Во ова брзо и хаотично секојдневие на интереси, уметниците се движат во две насоки: едната води кон човековото внатрешно, во потрага по приватни простори и лични идентитети, а втората кон надвор – неговата околина, во потрага по нови светови и нови хоризонти – вели Санев.
Посетителите ќе можат да ги видат делата до 24 часот. Некои од нив ќе можат да се посетат само во точно одредени термини: ликовниот перформанс на Јовица Мијалковиќ во 20.30 ч. на плоштадот „Филип Втори“, ликовно-театарскиот перформанс на Јана Манева Чупоска во 21 ч., во излогот на продавницата „Калиопе“ („Сити галери“), а ликовниот перформанс на Филип Фидановски во 22.30 ч. во ресторанот „Тиволи“ (ул. 11 Октомври, на плоштадот „Македонија“).
Другите дела ќе бидат достапни цела вечер. Изложбата ја организира Друштвото на ликовни уметници на Македонија.
