Љубителите на музиката вечер на Античкиот театар во Охрид ќе имаат несекојдневна можност да присуствуваат на музичко–сценскиот спектакл „Музика универзалис“ и настапот на легендарниот диџеј Дерик Меј со уметниците од Македонската филхармонија.
Според најавите на организаторот, станува збор за несекојдневно музичко доживување, фузија од електронска и класична музика, фантастични светлосни ефекти, видео и аудио поддршка, со настап на еден од пионерите на детроитската техно-сцена, во оркестарски аранжмани на нашиот музички уметник Емин Џијан. Оркестарот на Македонската филхармонија ќе биде збогатен со магичниот звук на пијаното во изведба на нашата афирмирана пијанистка Емилија Потевска.
Проектот е на продуцентската куќа „Излет мјузик“, а идеен творец е сопственикот на продукциската куќа, Огнен Узуновски – Оги, под покровителство на Министерството за култура. Концертот што е во рамките на одбележувањето на 70-годишнината од постоењето на најстариот национален ансамбл, концерт замислен како мала воздишка од класичната музичка програма што доминира на репертоарот на Филхармонијата, потрага по нови форми на презентација и нова публика во помладите генерации.
Дерик Меј е редовен гостин на домашните клупски сцени, почнувајќи од неговото прво гостување во 2000 година, за сега да има можност да се презентира во едно поинакво светло. Тој е еден од тројцата најзаслужни луѓе на светското технодвижење кои ги испробувале границите на духот на електронската музика и дале еден нов облик. Го нарекуваат Мајлс Дејвис на електронската музика, кој со својата музика ги освои сите европски и светски сцени и фестивали.