Од денеска до среда во Софија ќе се одржи манифестацијата „Денови на младата македонска проза“ што ја организира Друштвото за издавачка дејност „Македонска литера“ во соработка со Културно-информативниот центар на Република Македонија.
На манифестацијата, која е финансиски поддржана од Министерството за култура на Република Македонија, ќе учествуваат млади писатели, преведувачи и издавачи од двете држави. Ќе се одржи и трибина на која ќе се разгледаат можностите за соработка, ќе биде отворена и изложба на книги од млади македонски писатели, а ќе има и вечер посветена на младата македонска проза на која ќе се претстават седум македонски писатели.
Целта е да се овозможи непосредно запознавање на младите автори од двете држави и да се развие поголема меѓусебна соработка особено во областа на преведувањето и објавувањето на дела.
Во рамки на манифестацијата и на средбите со бугарските издавачи и писатели ќе биде претставен и конкурсот за странски издавачи на македонското Министерство за култура.
На Деновите на младата македонска проза ќе учествуваат Јулијана Величковска, Фросина Пармаковска, Живко Гроздановски, Петар Андоновски, Давор Стојановски, Михајло Свидерски и Верче Каранфилоска.
За потребите на манифестацијата отпечатена е и посебна брошура во која се претставени 17 млади македонски белетристи. Брошурата ќе биде претставена и на Меѓународниот саем на книгата што ќе се одржи во Софија во почетокот на декември годинава.