По повод Меѓународниот ден на книгата и заштитата на авторските права, Националната библиотека на Узбекистан приреди изложба на која се изложени книги на автори од разни поколенија, што, наведуваат, станале културно наследство на целото човештво, меѓу нив и дела од македонскиот поет и академик Ристо Василевски.
Покрај фотографиите на писателите кои им се познати на широк круг читатели на изложбата се прикажани и нивните мисли за книгите и читателите.
– Посетителите на оваа фото-книжевна изложба ќе се запознаат со обрасците на светската литература кои имаат најголема побарувачка меѓу читаталите – корисници на Библиотеката. Меѓу нив се издвојуваат Џејн Остин, Ристо Василевски, Агата Кристи, Вилјем Шекспир, Владимир Набоков и други, што го потврдува растечкото интересирање на читателите, истакнуваат од Националната библиотека на Узбекистан.
Ристо Василевски е автор на дваесетина поетски книги, книги поезија и романи во стихови за деца. Добитник е на повеќе значајни македонски, српски и меѓународни награди. Превел над 50 книги од македонската и српската литература на српски и македонски јазик и застапен е во голем број поетски антологии. Член е на Македонската академија на науки и уметности, Словенската академија за литература и уметност, Меѓународната асоцијација на писатели и публицисти, Друштвото на писатели на Македонија, Здружението на писатели на Србија и на Здружението на литературни преведувачи на Србија.