Битолското културно лето денеска продолжува со концерти на уметници од Чешка и од Македонија.
Концерт на етно музика ќе одржат „Томас Кочко и Оркестра“, музичари од Република Чешка кои ќе гостуваат во културниот центар Магаза, истакна Цветанка Ристевска портпарол на општина Битола, организатор на летната културна манифестација во овој град.
Во НУ „Завод и Музеј“ Битола ќе се одржи концерт на кемерното дуо виолончела Котевски-Пејиќ кои ќе исполнат дела од Крумер, Бах, Пјацола, Гардел и други композитори.
– Александар Котевски е наградуван виолончелист на неколку државни натпревари за камерна музика во Македонија, зад него се голем број успеси, а моментно е уметнички директор на Македонската опера и балет, додека пак Божидар Пејиќ освен со музицирање се занимава и со педагошка дејност како професор во ДМБУЦ „Илија Николовски-Луј“ во Скопје, истакна Ристевска.
Вечер на „БитФест“ на летната сцена Тумбе Кафе која годинава по втор пат е во функција на битолското културно лето ќе се одржи рок концерт на групата „Промашена инвестиција“ која се повеќе го привлекува вниманието на младите битолчани.