Унгарскиот мајстор на туба Роланд Сентпали денеска напладне во Камерната сала на Филхармонија ќе одржи концерт насловен „Бранч енд брас“.
Ова е прв пладневен концерт во Филхармонија, а публиката пред настапот на Сентпали ќе има можност во опуштена атмосфера во фоајето на Филхармонија да ужива во мала закуска и кафе.
Роланд Сентпали е роден во Унгарија, а еуфониум почнал да свири на 12 години. Продолжил да изучува туба под менторство на Сандор Лукаш. Студирал на академијата „Бела Барток“, а потоа и на академијата „Франц Лист“. Сентпали е и композитор и арнжер, а негови композиции се дел од репертоарот на речиси секој тубист.
Моментално е прв тубист во Унгарската филхармонија, а постојано одржува мастер класови во Европа, САД и Јапонија.
Со Сентапали заедно на сцена ќе настапат Младен Ѓорѓевиќ – труба (Србија), Драган Младеновски – труба, Јордан Колевски – труба, Горан Арменски – труба, Милан Роксандиќ – хорна (Србија), Благоја Василевски – хорна, Димче Белчовски – тромбон, Тибор Балинт-тромбон (Србија), Бранко Илиевски – тромбон, Никола Ристевски – тромбон, Александар Ниниќ – туба. Гостин на концертот е диригентката Дијана Имери-Илкоска. На програмата се дела Чајковски, Габриели, Хендл и Стевенс.