Писателот од Битола и член на Друштвото на писателите на Македонија, Добре Тодоровски ја доби наградата „Крсте Чачански“ што ја доделува културниот центар „Бран“ и Ревијата за книжевност „Бранувања“ од Струга.
Тодоровски е награден за неговата книга „Помен за едно време“, а врачувањето на наградата ќе биде на 3 јули во Центарот на култура „Браќа Миладиновци“-Струга, кога ќе се одржи фестивалот „Струшки книжевни средби 2015“.
– Оваа награда всушност е признание препознато од квалитетна жири комисија која внимателно го анализирала и оценила мојот труд. Расказите во „Помен за едно време“ се исечоци од мојот интимен дневник и носат изворни белези кои вреди да се прочитаат, истакна Тодоровски по соопштувањето дека е добитник на наградата „Крсте Чачански“.
Културниот центар „Бран“ од Струга објави дека наградена е и книгата „Барутна поезија“ од авторот Славчо Ковиловски, кој ќе ја добие наградата „Јован Котески“. Со тоа заврши Конкурсот што по петти пат го распиша Културниот центар „Бран“ и Ревијата за книжевност „Бранувања“ од Струга.