Песната „Азиланти“ од Лидија Димковска во препев на германски и англиски јазик утре ќе биде прочитана од љубители на поезијата на пет локации низ Берлин, Германија.
Читањето е дел од целодневната манифестација „Берлин чита“ што се организира непосредно пред почетокот на меѓународниот книжевен фестивал во Берлин кој ќе трае од 9 до 19 овој месец.
На „Берлин чита“ ќе се претстават преку 50 прозни и поетски дела поврзани со бегалската и азилантската криза.
Поезијата на Димковска во препев на Александер Сицман (германски) и на Љубица Арсовска и Пеги Рид (англиски), ќе биде прочитана пред Народниот театар на плоштадот Роза Луксембург заедно со дела од Брехт, Амос Оз и Драго Јанчар, како и пред подземната железница на плоштадот „Ернст Ројтер“, на „Плоштадот на мирот“, на „Зимскиот плоштад“ и во Европската гимназија „Берта фон Сутнер“.
Берлинскиот меѓународен книжевен фестивал кој објави и публикација со избраните книжевни дела за книжевниот перформанс Берлин чита! се одржува по петнаесетти пат во главниот град на Германија и важи за еден од најдобрите книжевни фестивали во Европа. Лидија Димковска беше учесничка на фестивалот во 2010 год.