Антологија на петнаесет современи македонски поети „Од живиот извор“ на македонски и на српски јазик објави реномираниот издавач Задужбина „Петар Кочиќ“ од Бања Лука. Составувач и преведувач на двојазичната Антологија е академик Ристо Василевски.
Во неа со по 10 песни се застапени: Матеја Матевски, Влада Урошевиќ, Радован Павловски, Богомил Ѓузел, Ефтим Клетников, Санде Стојчевски, Ристо Лазаров, Веле Смилевски, Раде Силјан, Катица Ќулавкова, Весна Ацевска, Бранко Цветкоски, Славе Ѓорѓо Димоски, Лидија Димковска и Јовица Тасевски-Етернијан – поети кои се уште активно творат и со своите дела ја збогатуваат современата македонска поезија.
Во својот минуциозен предговор составувачот вели дека за овие имиња се определил „затоа што околу и над нивните поетски целини се разви аура и затоа што со нивните значења може да се исплете мрежата на сета современа македонска поезија и да се добие увид во сè она што е во неа врвно.“
При објавувањето на оваа своевидна Антологија издавачот направи исклучок и наместо досега практикуваниот формат – осум поети со по осум песни, прифати во неа да бидат застапени 15 поети со по десет песни. Автор на поговорот е поетот и литературен критичар Никола Вуколиќ, директор и главен уредник на Задужбина „Петар Кочиќ“.