Министерството за култура во овој период добива голем број барања за префрлување актери и вработени во културата од едно место во друго, изјави министерот Роберт Алаѓозовски, нагласувајќи дека не се работи за нови вработувања, ниту за некомпетентни автори или уметници, туку за социјални прашања и барања на самите вработени.
Изјавата на министерот е одговор на реакцијата на в.д. директорот на Драмски театар Сашо Тасевски кој вчера на социјалните мрежи му напиша на министерот дека нема да дозволи без да биде консултиран да му се наметнува трансфер на актери од други театри кои не му се потребни на Драмски чие ниво, како што смета, опаднало во последните години зашто се примале актери преку негативна селекција и протекции.