Собранието на Република Македонија денеска ќе го одржи првото продолжение на 54-та седница на која ќе се гласа по повеќе Предлог-одлуки и ратификации.
Пратениците треба да се изјаснат по предлогот за избор на претседател и комисионери (членови) на Комисијата за хартии од вредност на Република Македонија, за именување член на Советот на експерти на Агенцијата за супервизија на осигурување, за именување претседател и членови на Советот на експерти на Агенцијата за супервизија на капитално финансирано пензиско осигурување, како и по престанокот на мандат на член на Советот на Јавното претпријатие Македонска радио телевизија.
Ќе се гласа и за предлог-законот за ратификација на Договорот меѓу Република Македонија и Република Србија за меѓусебно извршување на судските одлуки во кривичните предмети, за Спогодбата меѓу Владата на Република Македонија и Советот на министри на Босна и Херцеговина за соработка во областа на здравството и медицинските науки и за ратификација на Договорот за Централноевропската програма за размена на универзитетски студии.
На дневниот ред меѓу другите се и предлог-законите за изменување и дополнување на Законот за електронските комуникации, на Законот за виното, на Законот за сточарството, за земјоделски задруги и на Законот за културата, сите во второ читање.
На дневниот ред е и Предлог-законот за заштита на децата, во второ читање.
Расправа се очекува и по дополнетиот Предлог на закон за партиски истражувачко аналитички центри, како и за Предлог-законот за дополнување на Законот за политичките партии, во второ читање.
На денешната седница меѓу другите на агендата е и Предлог-законот за изменување и дополнување на Законот за финансирање на политичките партии, во второ читање, како и Предлог деловникот за изменување и дополнување на Деловникот на Собранието на Република Македонија, по скратена постапка.