Кина, наводно, уапсила поранешен висок канадски дипломат и актуелен советник на невладината „Меѓународна кризна група“ (ИЦГ).
Поранешниот канадски дипломат Мајкл Ковриг е уапсен во Кина, соопштија денеска двајца извори, а неговиот сегашен работодавач соопшти дека бара негово брзо и безбедно ослободување.
„Правиме сè што можеме за да дојдеме до дополнителни информации за тоа каде се наоѓа Мајкл, но и работиме за негово брзо пуштање на слобода“, се наведува во соопштението на ИЦГ.
Ковриг се занимава со истражување и анализа на надворешни работи и безбедносни прашања во североисточна Азија, пред сè во Кина, Јапонија и на Корејскиот Полуостров. Пред да се приклучи на ИЦГ во 2017 година, тој работеше како канадски дипломат во Пекинг, Хонг Конг и Обединетите нации.
Апсењето на Мајкл Ковриг доаѓа откако полицијата во Канада ја уапси директорката за финансии на кинеската компанија „Хуавеј Технолоџис“ Менг Ванжу на 1 декември, по барање на американските власти, по што следуваше остра кинеска реакција. Засега не е познато дали двата случаи се поврзани.