Претседателот на ВМРО-ДПМНЕ, Христијан Мицкоски денес, заедно со Александар Николоски и Влатко Ѓорчев се сретна со претседателот на националниот совет на Австрија Волфганг Соботка.
На средбата се разговарало за повеќе теми важни за стратешките приоритети на Република Македонија, како и за актуелните политичка и економска состојба во државата.
„Претседателот Мицкоски на средбата го информираше својот соговорник за политичкиот прогон кој го спроведува власта, преку монтирани случаи и злоупотреба на институциите. Претседателот на ВМРО-ДПМНЕ посочи дека однесувањето на власта кон политичките противници е далеку од западните и европски вредности кон кои се стреми Македонија. Мицкоски ја потенцираше и влошената економска состојба во Македонија која е резултат на неспособноста на актуелната власт. Тој истакна дека стандардот на граѓаните е во континуиран пад, реализацијата на капиталните инвестиции е катастрофална, а владата не може да обезбеди економски раст“ соопштија од ВМРО-ДПМНЕ.
Соговорниците разговарале и за реформските приоритети кои се важни за членството на државата во ЕУ и НАТО.
„На средбата беше истакнато дека е од огромно значење поддршката на Република Австрија за членство на Република Македонија во ЕУ и НАТО, но приоритет е земјата сериозно да се зафати со реформи во кои за жал моментално власта сериозно заостанува“ се вели во соопштението на ВМРО-ДПМНЕ.