Царинската служба во Германија денеска соопшти дека се обидува да ја утврди автентичноста на банкарскиот чек во вредност од околу 70 милиони долари, најден во рачниот багаж на ирански патник на аеродромот во Диселдорф, пренесе ДПА.
Чекот со вредност од над 300 милиони венецуелски боливари е издаден од Централната банка на Венецуела. Тој бил најден минатиот месец од цариниците, кога неименуваниот Иранец од Турција пристигнал на аеродромот во Диселдорф.
Според германскиот весник „Билд ам зонтаг“, Иранецот е Тахмашб Масахери, поранешен министер за финансии на Иран.
Британскиот „Дејли мирор“ го идентификува Иранецот како Тахмасб Мазахери, гувернер на Централната банка на Иран до 2008 година.
Цариниците, меѓутоа, одбија да го потврдат идентитетот на човекот, кој не е уапсен.
Тој веројатно на аердромот пријавил дека со себе носи помалку од 10.000 евра. Според правилата на ЕУ за внесување на банкноти и хартии од вредност во висина над 10.000 евра тие треба да бидат пријавени според мерката спречување на перењето пари и финансирање терористи, посочува ДПА.