Унијата на млади сили на ВМРО-ДПМНЕ денеска промовираше 14 аудиолектири за прво и второ одделение наменети за деца со оштетен вид.
УМС го иницирала проектот за да им овозможи на слепите деца во Македонија достапност на училишните наслови. Проектот е прв од низата коишто ќе следуваат, а е резултат на потпишаниот Меморандум за соработка со Сојузот на слепи лица во Република Македонија од 3 декември 2011.
Претседателот на УМС на ВМРО-ДПМНЕ Диме Спасов ја нагласи важноста на образованието и ги повика и другите младински здруженија да се придружат во тој општествено корисен проект.
– Ова е нов проект на УМС со кој се надевам дека на сите слепи дечиња ќе им ги направиме подостапни лектирите и книгите и дека ќе внесеме свежина во нивното секојдневие и ќе им помогнеме во нивната едукација. Аудиолектирите не се нешто ново и слични проекти има во земјите на Балканот и во Европа. Слепите во Македонија досега однадвор земаа книги и ги слушаа на српски или на хрватски јазик и затоа се одлучивме за овој проект со кој тие полесно ќе се снаоѓаат зашто сите не го познаваат Брајовото писмо и не можат да ги прочитаат книгите. Ова е одлична можност за нив, а УМС и во иднина ќе продолжи континуирано да го реализира проектот, рече Спасов.
Меѓу аудиолектирите се: „Снежана“, „Зоки Поки“, „Рибарот и рипката“, „Приказни по телефон“, „Македонски народни приказни“, „Грдото пајче“, „Д-р Оф Боли“… Секоја лектира е снимена на посебно ЦД во 50 примероци и е опфатена целата содржина на книгите како и во нивните печатени изданија. Гласовите се на пејачи од естрадата и на некои членови на УМС. Стефан Филиповски од дуото „Некст тајм“ рече дека е среќен што помага на децата со оштетен вид. – Ми беше тешко да читам зашто одамна немам прочитано лектира, рече Филиповски кој е дел од тимот којшто ги снимал лектирите, а покрај него од естрадата учествуваат и Панчо од ДНК, Викторија Лоба…
За иницијативата на УМС на ВМРО-ДПМНЕ се заблагодари Жарко Селковски, претседател на Сојузот на слепи лица во РМ кој истакна дека покрај овој проект којшто пред се е наменет за децата со оштетен вид од училиштето „Димитар Влахов“ имало и други проекти за кои добиле помош од Унијата. Минатата година, како што рече, за меѓународен семинар добиле помош за превоз и обезбедени преведувачи на англиски јазик.