Властите во Пекинг привремено затворија повеќе од сто фабрики кои ја загадуваат животната средина. Таквата одлука е донесена поради опасно високото ниво на загаденост на воздухот во Пекинг и северна Кина.
Густата сива магла од смог втор пат за две недели ги принуди и воздухопловните компании да ги откажат летовите, а градските власти да го предупредат населението да остане на затворено.
Видливоста во центарот на Пекинг денеска беше намалена на 200 метри, а пешаците и велосипедистите повторно носеа маски, пробивајќи се низ смогот и покрај предупредувањето на властите дека загадувањето е сериозно.
Американската Амбасада, која го мери нивото на ситни честички во воздухот, така наречени ПМ2,5, измери загадување од 526 микрограми на кубен метар што е над скалата на нормалниот индекс на мерење и повеќе од 20 пати од дозволената загаденост според препораките на Светската здравствена организација.
Во некои делови од североисточна на Кина видливоста е помала од сто метри. „Ер чајна“ откажа 14 домашни летови од Пекинг, а аеродромот во источниот град Чингдау е затворен и сите летови се откажани. На аеродромот Џенгџоу во провинцијата Хенан се откажани 109 летови, а маглата ќе трае до четврток.
Смогот овој пат освен здравствени проблеми предизвика и главоболки кај патниците, бидејќи во Кина ова е прва недела на почетокот на транспортниот хаос и на патувањата на луѓето од едниот до другиот крај на земјата за да бидат со своите семејства за кинеската Нова година на 10 февруари. Традиционално периодот пред и по Лунарната нова година претставува најголема миграција на населението во светот.