Собранието на Република Македонија денеска ќе го одржи третото продолжение на 52-та седница, на која ќе расправа за оставките на Благоја Гешоски и Јанаќе Витановски на функцијата член на Комисијата за верификација на фактите.
На дневниот ред на седницата се повеќе предлог-закони кои треба да бидат донесени по скратена постапка, меѓу кои се Предлог-законот за медицинските студии и континуираното стручно усовршување на докторите на медицина и Предлог-законот за изменување на Законот за здравственото осигурување.
Пратениците ќе дискутираат и за Предлог-законот за изменување и дополнување на Законот за јавен долг и за Предлог-законот за дополнување на Кривичниот законик, двата во прво читање, поднесени од група пратеници од опозицијата.
На агендата се и Предлог-националната стратегија за развој на културата за периодот 2013 – 2017 година и Годишната програма за работа на Агенцијата за електронски комуникации за 2013 година.