Никола Цветкоски од ВМРО-ДПМНЕ во изјава за медиумите рече дека тоа што вчера се случуваше во тунелот на автопатот Демир Капија – Смоквица било трагикомично.
– Вчера екипата на Заев, предводена од директорот на Јавното претпријатие за државни патишта Зоран Китанов, државната свеченост за отворање на автопат ја претвори во циркус, срам и јавен блам. И тоа на проект кој тие не го изградија. Поточно СДСМ не е одговорна за работа, туку само во делот на славење. На оваа лакрдија не се знаеше ни кој пие, ни кој плаќа, ни кој тера чочеци, ама се виде кој плаќа бакшиш. Тоа беше директорот Китанов. Срам невиден, рече Цветкоски.
Тој додаде дека тоа не било доволно, па дел од славјето биле и двокатните панорамски автобуси, по претходна дозвола на градоначалникот Шилегов.
– Запазете во истите тие автобуси кои СДСМ секојдневно ги критикува. Во центарот на прославата беше токму директорот на ЈП Државни Патишта Китанов. Видовме како ја предводи групата славеници и дели пари на музиката. Човекот кој треба да изгради 600 километри нови автопати, како што ветуваше Зоран Заев во кампања, дели пари како бакшиш наместо да гради патишта. Еве на ова се сведе стратегијата на СДСМ за инвестирање во инфраструктурата, рече Цветкоски.