Турскиот премиер Реџеп Таип Ердоган денеска изјави дека сирискиот претседател Башар ал Асад нема уште долго да остане на власт, како и дека сирискиот народ се бори против огромна неправда.
Ердоган ова го порача за време на денешната посета на Газиантеп, град во близина на сириската граница каде престојуваат голем број бегалци.
– Сирискиот народ се бори против една голема неправда. Тие се борат против диктатор за да го добијат правото кое им е одземено. Кога диктаторот ги протера од нивните домови, Вие ги прифативте, истакна Ердоган во обраќањето пред граѓаните на Газиантеп кои се собраа да го поздрават и кои прифатиле и вдомиле илјадници сириски бегалци.
Тој додаде дека Сиријците сакаат мир и слобода и да се борат против теророт.
– Не се грижите, бидејќи со неправда не може далеку да се стигне. За Сиријците победата е блиску, јас тоа го гледам. Над 60.000 Сиријци се убиени, а повеќе од 600.000 се бегалци. Зарем мисли Асад дека ќе успее на ваков начин? Ќе замине тој, сигурен сум, истакна турскиот премиер.