Пред Советот на општина Росоман денеска беше презентиран Интегрираниот систем за управување со цврст отпад во Вардарски регион.
Како што рече Ана Каранфилова-Мазневска од Министерството за животна средина и просторно планирање, изработената планска документација е основа за обезбедување финансиски средства за воспоставување на системот.
Според Општината, ќе следат интензивни активности за затворање на дивите сметишта и изградба на објекти за соодветно складирање и претовар на отпадот.
– Изработени се повеќе студии и документи, регионални планови за управување со отпад, стратегиска оценка на животната средина, физибилити студии, анализи на трошоци, оценка на влијанието врз животната средина, помош при изработка на тендерска документација за договори за работа и набавки за изградба на избрани инсталации за третман и отстранување отпад, затворање нестандардни/диви депонии и набавка на опрема за собирање и претовар на отпадот во согласност со стандардите на ЕУ, информира прес-службата на локалната самоуправа.