Новоизбраната обвинителка во Обвинителството за организиран криминал и корупција, Ивана Трајчева, по неполн месец во оваа Обвинителство, утврдила дека предметот „Банки“, во кој се осомничени одговорни лица во неколку комерцијални банки во земјата, треба да го води Основното јавно обвинителство. „Макфакс“ дознава дека новата обвинителка Трајчева одбила да ја прими претседателката на „Транспаренси интернешнл“, Слаѓана Тасева, како подносителка на кривичната пријава, со изговор дека треба да ја викне и другата страна.
Од Обвинителството за „Макфакс“ потврдија дека по извршениот увид, предметот „Банки“ ќе биде вратен во Основното јавно обвинителство. „Ве известуваме дека предметот беше побаран од Основното јавно обвинителство за гонење организиран криминал и корупција за да се изврши увид и да се утврди евентуално постоење надлежност за овој предмет. По извршениот увид и по прибирање на потребните списи, предметот ќе биде вратен во Основното јавно обвинителство Скопје на натамошно постапување“, стои во образложението на Обвинителството. Оттаму велат дека Вишото јавно обвинителство донело одлука само еден дел од предметот да го истражува Обвинителството за организиран криминал и корупција, а не целиот предмет. Станувало збор за одредено вештачење. Некои од оштетените на кои им се јави „Макфакс“ велат дека се зачудени од одлуката во толку краток временски период да биде проучен предметот и вратен во Основното јавно обвинителство. Неофицијално, обвинителката испратила покани до неколку од осомничените за да ги сослуша, но тие не се појавиле на сослушувањето. И покрај тоа, таа одлучила предметот да го истражуваат нејзините колеги во Основното јавно обвинителство.
Предметот во Обвинителството за организиран криминал и корупција го работеше обвинителката Лидија Раичевиќ, која поради неизборот во ова Обвинителство, не може повеќе да постапува. Обвинителката Раичевиќ веќе сослушала директори на неколку банки и предметот бил во напредна фаза пред отворање истрага.
Полицијата по неколкугодишна истрага, откри нелегална банкарска шема на давање кредити на македонски компании, најмногу преку Комерцијална банка – Скопје, кои, иако биле одобрувани како наменски, завршувале за отплата на лични кредити и купување недвижности и акции во македонски компании, капитално поврзани меѓу себе или со луѓе од управите на банките. Корисници на парите биле луѓе што се во управните одбори на неколку македонски банки и кои не смееле да си одобруваат кредити на сопствените фирми.
В. Маглешов