„Деновиве СОНК презема активности за враќање на работа на колегите на коишто не им беа породолжени договорите на определено време. Жалиме за состојбата во која се најдоа колегите, но недостатокот е системски, трае подолго време, а СОНК беше главен учесник во неговото создавање. Станува збор за Член 46 од Законот за работните односи кој бара 5 години работа во исто училиште за трансформација на работниот однос од определено во неопределено време.
Најстарите колеги меѓу нас се сеќаваат на времето кога решение за работен однос на неопределено време добивале од првиот ден на работа, има такви кои трансформација на работниот однос од определено во неопределно направиле после 3 или 4 години, а веќе подолго време за таа трансформација потребни се 5 години.
Секој што чекал 5 и повеќе години за трансформација на работниот однос знае дека тие се пеколни 5 години на чекање, неизвесност и трчање по врски на сите страни. Тие 5 години го партизираа образованието, наставниците ги претворија во експерти за врски и главна маса на партиските митинзи. Од своето постоење СОНК никогаш не се побунил против тие пеколни 5 години.
Всушност доколку СОНК имаше искрени намери кон истите колеги зошто не презеде дејства тие да не дојдат во незавидна ситуација?
Наставниците од Наставничкиот Пленум го повикува МОН да го изземе образованието од членот 46 од ЗРО со што ќе покаже вистинска волја за департизација на образованието.
Ги повикуваме наставниците да покажат дека не потпаѓаат под евтината глума на синдикализам на СОНК“ се вели во соопштението на група членови на Наставничкиот пленум.