Пробиен е патот до гевгелиското село Петрово, последно од завеаните од снегот во гевгелиско, со што од 22 часот синоќа во оваа општина сообраќајот е нормализиран на сите патни правци, информираа денеска од мобилната екипа за дејствување во зимски услови која беше формирана од градоначалникот на гевгелија Сашо Поцков.
Претходно, во текот на вчерашниот ден беа пробиени патните правци до Кованец, Моин и Ново Конско. Беше проширен и патот до село Богородица, а беа целосно исчистени од снег и автопатните ленти од клучката кај Гевгелија до граничниот премин Богородица.
Синоќа, откако снегот престана да паѓа на територијата на општина Гевгелија, на сите сообраќајници повторно беше фрлена сол, а во текот на денешниот ден механизацијата беше насочена кон проширување на градските сообраќајници и паркинг просторите пред сите училишта и детски градинки.