Регионалната канцеларија на Сојузот на синдикати на Македонија од Штип забележува дека осумдесет отсто од работодавците во источниот регион им исплатиле минимална плата на текстилните работници. Враќање пари на рака забележано е во две конфекции во Штип и Неготино.
Според нивните анализи работниците во реализирањето на своите обврски биле успешни во август и септември, додека во октомври, според некои сопственици на конфекции, покажале успешност од околку 65 отсто во шиењето на текстилните производи.
– Ако претходните месеци биле успешни, како тогаш сега тие работници станале неуспешни. Ова се пренесува во многу фирми во источниот дел на земјата се е со цел да се намали основицата и минималната плата да биде помала за работниците што ќе ја земаат. Но, од друга страна се рефлектира и на придонесот којшто треба да го уплатуваат работодавците и тој од околу 5.000 денари се намалува на 3.630 денари што се совпаѓа со барањата на работодавците во текстилната и кожарската индустрија да се плаќаат по 50 евра придонеси, вели Горан Трајков, претседател на Регионалната канцеларија на ССМ од Штип.
Тој кажа дека има докази за ова кои му се доставени од страна на работниците на кои не им е исплатена минимална плата согласно донесениот закон. Според него, преку номинираниот учинок се урива исплатата на минималната плата, а во една од конфекциите работниците биле казнети по 2.700 денари со образложение дека ја немаат реализирано поставената норма.
Според Трајков решение за овој проблем е формирање на државен Совет, којшто на годишно ниво би ја утврдувал нормата на работниците во сите индустриски гранки.