Објавен е тендерот за избор на компанија која ќе го гради тунелот на меѓу булеварите ВМРО и Кузман Јосифовски–Питу. Градските власти со ова ја започнуваат реализацијата на овој капитален проект, со кој се надеваат дека ќе се надмине сообраќајниот метеж во централното градско подрачје.
Подземната сообраќајница треба да има по една коловозна лента во секој правец и да биде со вкупна должина од 1.300 метри, од кои 900 метри ќе бидат под земја, а 400 метри над земја.
Проектната документација предвидува сообраќајницата да почне со кружен тек кај мостот Гоце Делчев и под Плоштад Македонија и Кеј 13–ти Ноември да излезе на идниот кружен тек кај булеварот Кузман Јосифовски–Питу, во близина на Народната банка на РМ.
Компаниите од градежниот сектор треба да ги достават понудите за изведба на сообраќајницата најдоцна до 10 јуни, за кога е закажано и нивното јавно отворање.
Градската власт определи три критериуми за доделување на договорот, при што најповолната финансиска понуда ќе биде вреднувана со 70 бодови, додека за кадровската екипираност и за техничката опременост се предвидени максимум по 15 бодови.
Кон крајот на годинава треба да започнат активностите за градење, ако сè се одвива според планираните рокови. Градењето треба да трае три години, а предвидената вредност на објектот се проценува на околу 32 милиони евра.