Многу граѓани утринава беа револтирани откако кучиња скитници собрани на градскиот плоштад трчаа и лаеа по нив.
Реагираа дека е недозволиво е во строгиот Центар на Скопје, десетина кучиња да лаат, да трчаат по луѓето, да плашат и деца.
Бараат градската власт под итно, како што ветуваше да изнајде соодветен начин и да го реши овој проблем кој би бил прифатлив за сите, и за жителите на Скопје, и за кучињата.
Посочуваат дека иста е сликата и пред споменикот на „Воинот на коњ“, улица Македонија, пред Министерството за правда и околу влезот на Министерството за транспорт и врски.
Прашуваат дали треба да се случи нешто пострашно, да биде искасан некој за да се сетат да реагираат.
Расправата за кучињата скитници е вечна тема во Скопје за која нема решение кое би било прифатливо за двете страни со спротивни ставови. Од една страна се жителите кои бараат безбедност, се плашат од кучињата и не сакаат тие слободно да шетаат по улиците, а од друга страна се здруженијата за заштита на животните.