Невенка Стаменковска од ВМРО-ДПМНЕ денеска во изјава за медиумите рече дека Заев декларативно кажал дека одговорност мора да има и го повика да го разреши генералниот секретар на владата, кој го прекршил законот за спречување на судир на интереси.
– Рашкоски како Генерален секретар на владата се самопрогласи за член на собранието на акционери на Телеком за хонорар од 500 евра. Не е само неморално туку и е незаконско неговото однесување. согласно член 18 од Законот за спречување на судир на интереси, Драги Рашковски не може да биде член на управен или надзорен орган во трговско друштво, јавни претпријатија, агенции, фондови, но и сите други организациони облици со доминантен државен капитал, рече Стаменковска.
Таа додаде дека Рашковски заедно со неговата баба, Елена Начевска која била именувана во второстепената владина комисија и неговиот кум, адвокатот Дејан Костиќ треба да ги вратат народните пари кои ги земале по основ на плати и хонорари од буџетот на Република Македонија.
– Република Македонија не е ничија приватна сопственост и Рашковски заедно со Заев не можат да се однесуваат кон државата како кон колач кој ќе го поделат неколку фамилии од власта. Ова нема да трае долго. СДС нема да биде долго на власт. Потребна е оставка сега и веднаш. Заради ваквата неодговорност и неспособност СДС ќе се соочи со политичка казна на 15-ти октомври испорачана од граѓаните на Република Македонија, изјави Стаменковска.
