Во Гевгелија денеска се одржува третиот информативен семинар за економските аспекти на фотоволтаичните системи во рамки на ИПА проектот за промовирање на децентрализирано производство на енергија од обновливи извори што заедно го имплементираат Фондацијата за локален развој од Гевгелија и Сојузот на производители на еколошка енергија од Благоевград, Бугарија.
Организаторите посочија дека на овој семинар ќе им се пружи можност на присутните да научат повеќе за примената на фотоволтаичните системи во објекти како и за механизмите што ги одржуваат. Според нив, за обезбедување на инвестицијата, најважно е да се има соодветно планирање, тековно работење и правилно одржување на фотоволтаичните системи.
Главна цел на проектот, велат тие, е подобрување на свеста и градење систем на знаење за призводство на електрична енергија од обновливи извори на енергија како и воведување иновативни решенија за енергетска ефикасност на сите нивоа, поточно во домашни, јавни и деловни објекти.