Директорот на Царинската управа Ѓоко Танасоски најави брзо решавање на проблемите со кои се соочуваат шпедитерите, транспортерите и бизнисмените при царинските постапки.
На состанокот, организиран денеска во просториите на Царинската управа, тие посочија дека треба многу да се работи на искоренување на корупцијата, на објективност при селективноста во контролите и на забрзувањето на царинските постапки.
Директорот Танасоски вети дека максимално ќе се посвети на зголемување на довербата меѓу Царината и учесниците во царинската постапка, а со тоа и на искоренување на корупцијата, како и на развивање на стратегии, процедури и методи за олеснување на протокот на трговијата и преземање на мерки согласно законски прописи и легитимните потреби на деловната заедница.
Денешниот состанок беше организиран со цел отворено да се разговара за секојдневните предизвици со кои се соочуваат директните учесници во царинските постапки и да се слушнат предлози како Царинската управа и бизнис заедницата заедно да создадат конкурентен економски амбиент.
Од Царината најавуваат дека и во иднина ќе организираат вакви средби за да се подобри работењето и унапреди соработката со сите чинители во царинските постапки.