ВМРО-ДПМНЕ ја напушти седницата на охридскиот совет на која се носеше буџетот за општината за 2013-та година. Според нив, буџетот бил неразвиен и нереален и бил копија на буџетот за 2012-та година.
„Она што денеска го видовме како предлог на буџет не е поставен на оние основи врз кои Охрид треба да се развива. Нема проекти и нема развој туку само елементи кои треба да се прилагодат на еден предизборен период.
– Ние можевме да поднесеме вкупно 3.874 амандмани и да го блокираме носењето на буџетот, но ние тоа не го направивме бидејќи сме одговорни. За нас Охрид е важен за да си играме со такви сценарија“, изјави Дејан Пановски, координатор на советничката група на ВМРО-ДПМНЕ.
Од СДСМ рекоа дека ВМРО-ДПМНЕ со ова покажува несериозност кога е во прашање Охрид.
„Мене ми е криво што немавме можност да се спротивставиме, не со физичко насилие туку со силата на аргументите.
– Нашите колеги советници не се виновни за нивниот потег, туку ова е директива од централата од Скопје“, рече Томислав Тунтев, советник на СДСМ.
Буџетот за 2013-та година изнесува 16 милиони евра и е за 5 милиони евра поголем од тој за 2012-та.