ВМРО-ДПМНЕ со писмено соопштение реагира на објавата на генералниот секретар на Владата, Драги Рашковски, дека Владата на ВМРО-ДПМНЕ планирала изградба на станови за бегалците уште во 2011. година.
Тие пишуваат дека Владата на СДСМ и дел од медиумите се обидуваат да го оттргнат вниманието од нивната стратегија за трајно населување во Република Македонија на илјадници мигранти.
Владата на СДС преку министерството за труд и социјална политика и министерката Царовска има испратено дописи до општините во кои се бара обезбедување на локации за изградба на објекти за домување кои ќе бидат за населување на мигранти, се вели во соопштението.
Според ВМРО-ДПМНЕ, медиумите, пренесувајќи го Генералниот секретар на Владата, Драги Рашковски, манипулираат со дописи од МТСП од 2011-та година, кои што првенствено се однесуваат за изградба на социјални станови, за социјално необезбедени лица, или лица кои се раселени во Република Македонија, а потекнуваат од косовскиот конфликт од 90-тите, а не за мигранти од Сирија, случаи кои тогаш и не беа проблем по интензитетот како што се сега. Владата на ВМРО-ДПМНЕ изминативе 6 години, откако е испратен дописот со кои манипулира Генералниот секретар на Владата Рашковски, не изградила ниту еден објект за населување на мигранти.
СДСМ, Заев и Царовска треба да одговорат како ќе им обезбедат работа и егзистенција на десетиците илјади мигранти кои планираат да ги доселат во Република Македонија, велат од ВМРО-ДПМНЕ и прашуваат дали лицата кои ќе се доселат ќе имаат бесплатно здравство, бесплатно образование на штета на граѓаните на Република Македонија.
На крајот на соопштението ВМРО-ДПМНЕ повикува на одговор на прашањата околу „Стратегијата за мигранти, бегалци и странци 2017-2020 година“.